एमाले मुख्यालय घेराउ
एमाले नेताहरु वामदेव गौतम, झलनाथ खनाल र अमृत वोहरालाइ गिरफ्तार गर्ने प्रयास गर्दै सशस्त्र प्रहरीले मंगलवार तीनघण्टासम्म एमाले केन्द्रिय कार्यालय घेराउ गरेको छ ।
एमाले स्थायी समितिको बैठक वस्ने थाहा पाएपछि नेतात्रयलाइ गिरफ्तार गर्न सशस्त्र प्रहरीका एसएसपी माधव थापा र डिएसपी राजु अर्यालको नेतृत्वमा प्रहरीले दिउँसो २ वजेदेखि ५ वजेसम्म एमाले मूख्यालय घेराउ गरेको थियो ।
तर राष्ट्रसंघीय उच्चायुक्त इयान मार्टिन सहित मानव अधिकारवादीहरुको टोली एमाले मूख्यालयमा पुगेपछि प्रहरी पछाडि हटेको थियो भने नेतात्रय गोप्यस्थानतर्फलाग्नु भएको थियो । सुरक्षाकर्मीको व्यापक खोजतलासका बाबजुद पनि एमाले स्थायी समितिको वैठक वसेको थियो ।
स्थायी समितिको मंगलवार वसेको बैठकले नगर निर्वाचन बहिष्कार गरी जनताले सरकारलाइ पराजित गरेको निष्कर्ष निकालेको छ । बैठकपछि कायवाहक महासचिव अमृतकुमार बोहराद्वारा जारी विज्ञप्तीमा सरकारलाइ असफल पारेकोमा जनतालाइ धन्यवाद दिइएको छ । शाही आयोग खारेज गर्ने सर्वोच्चको फैसलालाइ एमालेले संवैधानिक, सकारात्मक र स्वागतयोग्य भनेको छ । बैठकले फागुन ७ गतेको कायक्रम सशक्त वनाउन आह्वान समेत गरेको छ ।
